Монастырь на Калужке
Русская Православная Церковь. Калужская митрополия. Женский монастырь Калужской иконы Божией Матери
Мы ВКонтакте
Служба

Служба иконе Божией Матери, именуемой «Калужская»

НА ВЕЛИЦЕЙ ВЕЧЕРНИ

На Господи, воззвах: стихиры, глас 4:

Яко преукраше́нная Божественными лепотами / и яко невестническими зарями осияваема, / во образе Калужстем показу́ешися, / книгу имущи в руце́ Закона Всевышняго, / яже в сердце Твоем сохра́нши Того глагол, / темже и во чреве Твоем богописано вообразився Христос, / воплощается на спасение наше воистину. / Того моли, Всеблаженная, // чтущих Твой образ покрыти благостию.

Яко в монашеския ризы одеяна / и красоту целомудренную являющи девства Своего, / предста Царица во образе Калужстем именуемом / и обличивши студ злонравныя жены, / прописует ныне чтити Свой образ чудотворный воистину, / и со страхом притекати яко ко источнику целебному // и от смертоносныя язвы изба́вительному.

Полцы́ падоша иноплемении / и оружено́снии ага́ряни обратишася вспять, / зряще на возду́се Твой солнцезрачный, Пречистая, образ, / зарями блистающийся чудес присно / и Ангелы носимый со многими славословии. / Тем же любовию празднующия Твое явление, Богоневестная / покрый благостию Твой град и люди, // и от враг видимых и невидимых избави рабы Твоя.

Ины стихиры, глас 8:

О преславнаго чудесе! / Святолепно во тьме возсия / чудотворный образ Богородицы Калужския, / яко в ризы монашеския облаченная Жена, / целомудрия красоту показующи, / наказующи злонравныя девицы душевную нечистоту, / яко да познают невернии силу Твою, / и да покло́нятся и покоря́тся, // и исцелений струи́ почерпнут от иконы Твоея, Владычице.

О преславнаго чудесе! / Како на возду́се икона Твоя является, / враги устрашает и обращает вспять, / русския же полки утверждает. / О, великих Твоих благодеяний, Пречистая, / яже явила еси на земли Калужстей, / не престани и в грядущая лета / покрывати и спасати от враг видимых и невидимых // притекающих к цельбоносной иконе Твоей.

О преславнаго чудесе! / Великий дар ныне явися / образ чудотворныя иконы Калужския Богоматере, / яже источает исцеления обильная, / научающи страху Божию всяк возраст и всякое сословие / и благочестно воздвизает верных вопити: / о великаго Твоего заступления чудо, / имже врази невернии падоша // и язва губительная отгнашася.

Слава, и ныне, глас тойже:

Возрадуйся, земле Калужская, / пе́сньми пле́щущи духовными, / яко преславное чудо в тебе совершися, / свиток Богоотроковицы простре́ся / и в темном месте светолепно возсия / яко целомудрия слава и девства печать. / Сего ради де́монстии полцы́ приходят в трепет, / род же христианский присно зовет: / о Дево, Калужская похвало, / Твоими молитвами ненаве́тну соблюди Русь Православную // и покрый от бед Твой град, Богоневестная.

Вход

Паримии Богородицы

Стихиры на стиховне, глас 8:

Что Тя наречем, Чистая: / Свиток ли пророчески Богопи́санный, / книгу ли запечатанную Духа печатию, / или скрижаль Завета Новаго, / в ню́же пе́рстом Божиим вписа́ся Слово Отчее / и изгладися древнее проклятие, / и верным подписа́ся грехов оставление //Твоим ходатайством, Богоблаженная.

Стих: Слыши Дщи и виждь, / и приклони ухо Твое.

Что Тя наречем, Дево Богородице: / монашествующим покров и преподобным заступление, / девственниц защиту и непорочных украшение, / целомудренных супругов венец благочадия / и Райскаго веселия верным ходатаицу. / О, Дево, Мати Сладчайшая, // моли спастися всем нам.

Стих: Лицу Твоему помолятся / богатии людстии.

Что Тя возименуем, Мати Владычице: / Возбранную ли Воеводу народа русскаго, / крепость веры Православныя, / щит, о немже сокрушаются стрелы лукаваго, / шлем спасения и падших воззвание, / необоримую заступницу земли Калужския. / О, многих Твоих благодеяний, Мати Милосердная, // моли спастися всем нам.

Слава, и ныне, глас 4:

Всечестное явление Твоея иконы, Владычице, / град Твой Калуга песненно превозносит, / благодарный глас простирая во всякую весь / и Твой почеству́я образ благоче́стным пра́зднеством, / имже изба́влени быхом от нашествий вражиих / и всегубительныя болезни свободихомся, / но и доднесь чудодейственныя струи́ испущает Твой образ Калужский / верою притекающим к нему. / Темже в крове молитвенных крил Твоих надеятися и́мут сы́ны челове́честии, // яко с нами Твоя помощь до скончания века.

Тропарь, глас 4:

Заступнице от враг иноплеменных Необоримая Калужския земли, / и Изба́вительнице от смертоносныя язвы Милостивая! / Избави рабы Твоя от всяких бед и болезней, / с верою и любовию прибегающия к чудотворней иконе Твоей // и спаси души наша.


НА УТРЕНИ

Тропарь трижды

По 1-м стихословии седален, глас 4:

Образ Твой, Владычице, Тя прославити хотя, во сне страждущей девице явися и исцеление дати обеща: темже и моя немощи посети и телеси исцеление даруй, и душу помилуй, благая.

Слава, и ныне, тойже:

По 2-м стихословии седален, глас 4:

Во прасе многая лета в небрежении пребывающи икона Калужская, болящей рабе Твоей открыся, ейже и здравие подала еси, милосердия Мати: и наших скверн не возгнушайся, Пречистая, но омый их благодатию Матерски.

Слава, и ныне, тойже:

По полиелеи седален, глас 4:

Яко смиренная Дева, / чтущая Слово Божие, / явилася еси на иконе Твоей Калужстей / Пречистыма рукама Твоима книгу держащи: / сподоби и нас во смирении при ногу Иисуса Сына Твоего, / яко Мария седети, // благую часть любве к Нему избравших.

Слава, и ныне, тойже:


По 50-м псалме стихира, глас 6:

К чудотворному образу припадем Пресвятыя Богородицы / и благоговейно взирающе на Пречистый лик Ея, / наставляяй нас боголепно чтити закон Всевышняго / и со страхом глаголы Его в сердце хранити, / да просветившеся Словом Истины, / стези наша к деланию заповедей исправим / и благодарно Деве возопим: / спаси град и люди // Тебе чтущия Богоневестная.

КАНОН, глас 4:

Песнь  1

Отве́рзу  уста́  моя́,  /  и  напо́лнятся  Ду́ха,  /  и  сло́во  отры́гну  Цари́це  Ма́тери,  /  и  явлю́ся,  све́тло  торжеству́я,  //  и  воспою́,  ра́дуяся,  Тоя́  чудеса́.

Земле Калужская, возвы́си глас благосла́вный и Пречистей Деве благодарения принеси песнь, древле свободившей тя от вражиих пленений и от смертоносныя язвы избавившей.

Едина Пречистая, толиких сподобихомся благ от Тебе, Богомати, и аще достойный принести возможем благодарения Ти глас? Но якоже древле со Архангелом вопием Ти: радуйся, Благодатная, благословен над нами Твой покров.

Матернее Твое объемше попечение, не устрашаемся восстания оруженосных враг, но яко щит напреди́ поставляем Твою благословенную икону, юже трепещут демони, и га́лльская полчища обратишася вспять.

Любити Божий закон наставляющи нас, икону Свою, Богородице, явила еси в земли Калужстей, к ней же припадающе взываем: настави ны на стези правыя, Закононаставнице.

Якоже древле кивот Завета обносяще изра́ильстии людие, побеждаху иноплеменных с шумом полки, сице и ныне устрояет благодать иконы Богородицы Калужския, и вернии торжествуют, и русския обвеселя́ет полки.

Песнь  3

Твоя́  песносло́вцы,  Богоро́дице,  /  живы́й  и  незави́стный  исто́чниче,  /  лик  Себе́  совоку́пльшия  духо́вно,  утверди́,  /  в  Боже́ственней  Твое́й  сла́ве  //  венце́в  сла́вы  сподо́би.

Калужския веси да взыграют вся, чудеса зрящя совершаемая образом Чистыя Отроковицы, яко обуздова́ется развраще́нный девицы нрав, и красота проповедуется целомудрия, и зиждутся гради монашестии, и сокрушаются твердыни демонския.

Ангелосветлый Твой лик многое душам подает просвещение и добродетельныя прозябает плоды, темже яко первообраз прекрасный, икона Твоя чудеса источает, и землю Калужскую сотворяет благоцветущую.

Лицы празднующих песненно да торжествуют, и веси вся и гради Калужстии в кампаны да клеплют, и благословят Деву, едину в женах Бога во плоти рождшую.

Ужасает Твоих чудес благодать, и скорое Твое услышание, Пречистая, в священный приводит трепет, яко наказуеши грозно и врачуеши милостивно, и в совершение обещания ускоряеши, яко Едина еси Человеколюбивая.

Жажду Твоих, Дево, певцев утоли, яко славословити Тя есть неутолимая сладость, и величати в це́рквах Русских благочестно, и православно поклонение воздавати и честь святолепному образу Твоему Калужскому.

Седален, глас д 8

Силою невидимою Твоя икона, Богородице, одеяна, неисче́тную пучину чудес источает яве, и устрашает иноплеменных полки и ерети́чествующих разоряет соборища, здравие же независтно с верою притекающим дарует, и умножает веры познание: темже град Калуга непрестанно Тобою хвалится, Ты бо еси заступница земли Русския необоримая.

Слава, и ныне: тойже.

                                                                  Песнь  4

Седя́й  в  сла́ве  на  Престо́ле  Божества́,  /  во  о́блаце  ле́гце,  /  прии́де  Иису́с  Пребоже́ственный,  /  нетле́нною  дла́нию,  и  спасе́  зову́щия:  //  сла́ва,  Христе́,  си́ле  Твое́й.

Сорадуйтеся ми вся веси Русския, вопиет днесь Калужская земля, се бо явися во мне свет незаходимыя звезды, и источник исцелений верным отверзеся, образ Чистыя Богоотроковицы издре́вле именуемый Калужский.

Красно́ есть Пречистую Деву песньми псаломскими благодарити, образом Своим всеисце́льную подавшую благодать и язву всегубительную отвратившую от земли Калужския.

Адския силы Твоего, Дево, трепещут образа силу, и отступают полцы иноплеменных вспять, с нами бо неотлучно, Богородительнице, пребываеши и победоносну сотворяеши русскую рать.

Яко честнейшую херувим и преимущую сил Небесных почти́ Тя Сын Твой, Богоневесто, темже образу Твоему покланяемся, яко Царица еси Небесе и земли, имже украшается земля Калужская.

Божественный поражает Твой страх нераскаянных, и милостивный Твой лик ущедряет немощных: чудотворит Твой, Дево, образ Калужский и преславная показует знамения, и обращает к Сыну Твоему овцы заблуждшия.

                                                                      Песнь  5

Ужасо́шася  вся́ческая  /  о  Боже́ственней  сла́ве  Твое́й:  /  Ты  бо,  Неискусобра́чная  Де́во,  /  име́ла  еси́  во  утро́бе  над  все́ми  Бо́га  /  и  родила́  еси́  Безле́тнаго  Сы́на,  /  всем  воспева́ющим  Тя  //  мир  подава́ющая.

Лужецкая весь и Можайская песньми взыграйте плещущя, се бо целомудрие в вас проповесть Богоневестная Дева, и на путь добродетели наставляет юнейших отроковиц, и преславными утверждает знаменьми благочестие.

Ангельския превышши чистоты, в вышняя селения востекла еси, Обрадованная, и оттуду почитающим Твой образ, Отроковице чистая, подаеши исцелений благодать, и душам целомудренным одежду нетления.

Град Калуга о Тебе, Дево, хвалится, чудотворным украшаяся образом Твоим, и немолчная Тебе приносит песнопения: Ты же, Богородительнице, заступи и от бед различных нас спаси и скорбей ненача́емых.

О, чудес Твоих, Богородице, пучина! О, милостей Твоих неизсле́димая глубина! Яко спасаеши выну град Твой от иноплеменных нахождений и исцеляеши болезни верных раб Твоих.

Стена крепкая и благочестия ограда чудотворная икона Твоя, Богородице, сущи: сего ради еретическая посрамляются собрания и немощствуют, на Твой взирающа благий и светлый лик.

                                                                       Песнь  6

Боже́ственное  сие́  и  всечестно́е  /  соверша́юще  пра́зднество,  /  Богому́дрии,  Богома́тере,  /  прииди́те,  рука́ми  воспле́щим,  //  от  Нея́  ро́ждшагося  Бо́га  сла́вим.

Лукавый змий попирается ныне Женою, и яко о камень сего сокрушается глава, сила бо от иконы Богоматере Калужския происходит, и зарею чудес помраченная просвещает сердца.

От источник ныне пие́т неисчерпаемых земля Калужская, и напаяет благодатию всякую весь, и всяк храм чудотворный Твой лик имущий, имже цельбы точатся, верно любовию целующим его.

Воды точит животворныя и пиянства страсти изсушает икона Твоя, Дево: в ско́рбех притекающии к ней с верою приемлют исцеления, и трезвенному поучаются житию, благодарный Ти возсылающе ныне глас.

Исцелений богатый источник, в скорбех и нуждах всесильный покров, в печалех утешение и девственниц лепотное веселие Твоя, Дево, икона Калужская явилася есть.

Твердый щит противу галльских вой, и необоримая помощь чудотворный Твой образ показася: им бо, Дево, землю Калужскую спасла еси, и врага устрашивши обратила еси вспять.

Кондак, глас  6

Не имамы песней, ниже словес, / како достойно восхвалити Тя, / Мати Христа Бога нашего, / явления ради чудотворныя иконы Твоея земли Калужстей, / токмо можем вопити Тебе: / не отврати милости Твоея от нас, // и низпосли ю всем притекающим к цельбоносней иконе Твоей.

                                                                     Икос

Силою данною Ти свыше, чудотворную икону Твою, Пресвятая Богородице, даровала еси нам в знамение милости Твоея, и в явлении Своем прорекла еси: Буду ходатайствовати о граде Калузе и всех людех страны сея. Мы же взирающе на икону Твою и множество чудес от нея изливающихся видяще, с радостию припадаем к ней и из глубины сердца благодарно вопием: Радуйся, чудотворною иконою Твоею всю землю Калужскую озаряющая; радуйся, святую икону Твою в знамение милости Твоея нам давшая; радуйся, в защиту церкве Православныя чудеса показующая; радуйся, хулителей православныя веры наказующая; радуйся, болезнующих, оставленных врачами от смерти избавляющая; радуйся, яко молитвами Твоими престают тлетворнии ветры и смертоносныя язвы; радуйся, яко явлением на возду́се иконы Твоея страх и трепет нападоста на враги иноплеменныя; радуйся, яко явлением иконы Твоея во время брани победу российстей рати подала еси; радуйся, Владычице, милость Свою нам и заступление являющая.

 

Песнь  7

Не  послужи́ша  тва́ри  Богому́дрии,  /  па́че  Созда́вшаго,  /  но  о́гненное  преще́ние  му́жески  попра́вше,  /  ра́довахуся,  пою́ще:  //  препе́тый  отце́в  Госпо́дь  и  Бог  благослове́н  еси.

Благословляет немолчными песньми Твою, Дево, икону земля Калужская, и святолепный Твой лик почитает повсюду днесь, и в радости русстии люди играют зовуще: Благословен Господь, рождейся от Тебе, Пречистая.

Лучезарный Твой лик к поучению наставляет Божественному, и чудес Твоих пучину не вмещает и множество пишемых книг: темже якоже древле научени быхом, зовем Ти: Благословен Плод чрева Твоего, Пречистая.

Ангелосветлый Твой лик и целомудреннаго образа Твоего великая воистину сила, нечестивых развращенный попаляет нрав, и наставляет к лучшим изменитися добротам и взывати: Благословен Бог отец наших.

Госпожу Тя ныне нарицает и Богородительницу исповедует воистину Боровский некогда раскольнический град, но пришедшу образу Твоему, весь пременився чудесными зарями Твоими, православно взывает: Благословен Бог отец наших.

Озаряется ныне земля Калужская памятию Твоих чудес, и православных просвещаются собори, чудотворный имуще Твой лик, и монашествующих полцы благодарно взывают: Благословен, Богородительнице, над нами Твой покров.

Песнь  8

Отроки  благочести́выя  в  пещи́  /  Рождество́  Богоро́дичо спасло́  есть,  /  тогда́  у́бо  образу́емое,  /  ны́не  же  де́йствуемое,  /  вселе́нную  всю  воздвиза́ет  пе́ти  Тебе́:  /  Го́спода  по́йте  дела́  //  и  превозноси́те  Его́  во  вся  ве́ки.

Созывает ныне священная память Твоя людей многое множество, и ангелов светлый торжествует безчисленный лик, яко иконою Твоею умиряются концы земли русския, и о кающихся грешницех веселятся небеса.

Ликовник девический Твоя икона есть и прописательница целомудреннаго жития, и монашествующих покров, и церквей Русских благолепное украшение: в нихже поют Тя и благословят во вся веки.

Одеяние светоносное и просвещение душам низпосылаеши, Дево, всем к чудотворному Твоему верою притекающим образу, обнаженным Божественныя благодати и омраченным грехми.

Весь Тару́тинская велегласно проповедует всем, како на воздусе икона Твоя является, Владычице, и обращает вспять иноплеменных полки, и русстии воини верою утверждаются и благословят Тя во вся веки.

 

Песнь  9

Всяк  земноро́дный  /  да  взыгра́ется,  Ду́хом  просвеща́емь,  /  да  торжеству́ет  же  Безпло́тных  умо́в  естество́,  /  почита́ющее  свяще́нное  торжество́  Богома́тере,  /  и  да  вопие́т:  // ра́дуйся,  Всеблаже́нная,  Богоро́дице  Чи́стая  Присноде́во.

Евангельскую книгу в руце́ держащи, всех наставляеши Твоим Божественным образом Отроковице, еже поучатися сердцем в Законе Господнем день и нощь, яко да вселится в нас сила Вышняго, Тя величающих.

На Твой благообразный взирающе лик, недоумеем достойную Ти похвалу принести, Отроковице, но якоже древле Архистратиг научи: радуйся, благословенная в женах, вопием Ти, Едина Пречистая.

Нашествия вражия избави Твой град, и иноплеменных дерзость посрами, Владычице, и еретичествующих безумное шатание разори, не покланяющихся Тебе, ниже чтущих Твой образ, Едина Пречистая.

Устави смертоносныя язвы, возстания умири страстей и цельбоносным омофором Твоим землю покрый Калужскую, и вся бесовская наваждения, Дево, развей, Богомощными Твоими молитвами.

Юже славословят Ангельстии чини, Юже в пренебесный Херувими подъемлют Чертог и силы Небесныя Взбранную Воеводу именуют, Сию прослави, земле Калужская, едину помощь твою, Деву Пречистую, Заступницу необоримую.

Светилен, глас 2

Написану Тя книгу пе́рстом Божественным и запечатану, Пречистая, молю: молитвами Твоими да напишу́ся в книзе Жизни Вечныя, и прегрешения моя Твой Сын и Бог наш да изгладит, божественным и Матерским предстательством Твоим.

На Хвалитех: 

стихиры, глас 1:

Небесными чи́нми дориноси́мая икона Твоя / страхом поражает иноплеменных воинства, / и победу невоеванну дарует: / темже русстии полцы Тя ублажают, Пречистая, / в радости взывающе: // покрый нас яко щитом, кровом молитв Твоих.

Глаголы Гаврииловы сохраньши, / Слово Божие, Пречистая, вместила еси, / свиток Богоначерта́н явилася еси, Девице, / темже в книзе животней написатися молися / чтущим Твой образ, // Калуги украшение.

Девства светильник, чистоты сокровище, / Боголюбивую закона Наставницу, / евангельскаго любомудрия светлость / нам являет Твой образ Калужский, / Марие Богородительнице: // к Тебе припадающих спаси, яко Всесильная.

Стена необоримая граду Твоему, / исцелений источник людем верным, / еретиков посрамление, Церкве утверждение / Твой чудотворный, Дево, образ Калужский явися, / и молитвенная лествица небесная // Тебе поющим, Всепетая.

Слава, и ныне, глас 2:

В Царство Троицы превознесенная / и одесную Сына Своего седящая, / не забуди сро́дства Твоих сущих на земли, / во градех и ве́сех Калужских иконою Своею пребывающая, / посети Твой образ чтущих / и молитвами Матерними // ко спасению пути наша управи.